15 чэрвеня ў вёсцы Гарадзішча прайшло прыгожае і сардэчнае фальклорнае свята ”Ручнік як лёс“. У сёмы раз на ім сабраліся людзі, якія ашчадна берагуць і памнажаюць культурныя здабыткі продкаў. І як заўсёды, праграма мерапрыемства была вельмі цікавай і насычанай.
Чацвёрты год на свяце праводзілася выстава-конкурс ”Смаката ад патэльні, чыгунка“, да якой гаспадыні не толькі падрыхтавалі стравы нашых бабуль, але і добра іх прэзентавалі. Пра тое, што такое куфар і што ў ім захоўвалі нашы продкі, расказала Юзэфа Іосіфаўна Матошка, зберагальніца фальклору і народных традыцый. Вялікую цікавасць у гасцей выклікалі выстава дываноў ”Умелыя рукі“ і выстава ”Матулін ручнік“. З традыцыямі саломапляцення Беларусі, уключанага ў спіс нематэрыяльнай культурнай спадчыны ЮНЭСКА, а таксама з вырабамі з саломы пазнаёмілі майстры Докшыцкага раённага Дома рамёстваў.
Добры настрой прысутным падарылі ўдзельніцы фальклорнай групы “Скарбніца”, народны ансамбль народнай песні ”Прызбачка“ і народны хор работнікаў культуры раённага Цэнтра культуры ГУК ”Цэнтралізаваная клубная сістэма Бабруйскага раёна“.
Дзякуючы арганізатарам свята і мясцовыя жыхары, і госці атрымалі шмат пазітыўных эмоцый, дакрануліся да ўнікальнай і вельмі багатай народнай спадчыны.
